അതിതീവ്ര മഴ തുടരുന്നു; വയനാട്ടിലും കണ്ണൂരിലും ചുവന്ന ജാഗ്രത
തിരുവനന്തപുരം | സംസ്ഥാനത്ത് അതിതീവ്രമഴ തുടരുന്നു. രണ്ടു ജില്ലകളില് ഇന്ന് ചുവന്ന ജാഗ്രത പുറപ്പെടുവിച്ചിട്ടുണ്ട്. വയനാട്, കണ്ണൂര് ജില്ലകളിലാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പുള്ളത്. എട്ടു ജില്ലകളില് ഓറഞ്ച് മുന്നറിയിപ്പും പ്രഖ്യാപിച്ചിട്ടുണ്ട്. കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, കാസര്കോട് എന്നീ ജില്ലകളിലാണ് ഓറഞ്ച് മുന്നറിയിപ്പുള്ളത്.
കനത്ത മഴ തുടരുന്ന സാഹചര്യത്തില് ഇന്ന് വയനാട് ജില്ലയില് വിദ്യാഭ്യാസ സ്ഥാപനങ്ങള്ക്ക് അവധിയാണ്. കോഴിക്കോട് ജില്ലയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കും വിലങ്ങാടുള്ള സ്കൂളുകള്ക്കും അവധി പ്രഖ്യാപിച്ചിരുന്നു. റോഡില് വെള്ളക്കെട്ട് ഉണ്ടായതു മൂലമാണ് അവധി പ്രഖ്യാപിച്ചത്.
ചേവായൂര് എന് ജി ഒ ക്വാര്ട്ടേഴ്സ് ഹൈസ്കൂള്, കോഴിക്കോട് ഐ എച്ച് ആര് ഡി ടെക്നിക്കല് ഹയര് സെക്കന്ഡറി സ്കൂള്, കോട്ടൂളി ജി എല് പി സ്കൂള്, മുട്ടോളി ലോലയില് അങ്കണ്വാടി എന്നിവിടങ്ങളില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സാഹചര്യത്തിലും അവധിയാണ്.
