ഹാഷിഷ് ഓയിലുമായി ചൂണ്ടൽ സ്വദേശി കുന്നംകുളം എക്സൈസിന്റെ പിടിയിൽ
കുന്നംകുളം: ഹാഷിഷ് ഓയിലുമായി ചൂണ്ടൽ സ്വദേശിയെ കുന്നംകുളം റേഞ്ച് എക്സൈസ് സംഘം അറസ്റ്റ് ചെയ്തു. ചൂണ്ടൽകുന്ന് സ്വദേശി 35 വയസ്സുള്ള രഞ്ജിത്തിനെയാണ് കുന്നംകുളം റേഞ്ച് എക്സൈസ് ഇൻസ്പെക്ടർ കെ.മണികണ്ഠന്റെ നേതൃത്വത്തിലുള്ള എക്സൈസ് സംഘം 6 ഗ്രാം ഹാഷിഷ് ഓയിലുമായി പിടികൂടിയത്. മേഖലയിൽ പ്രതി ലഹരിവസ്തുക്കൾ ഉപയോഗിക്കുന്നുണ്ടെന്നും വിൽപ്പന നടത്തുന്നുണ്ടെന്നും എക്സൈസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് പ്രതി പിടിയിലായത്. സംഭവത്തെ തുടർന്ന് മേഖലയിൽ പരിശോധന ശക്തമാക്കുമെന്ന് എക്സൈസ് ഉദ്യോഗസ്ഥർ അറിയിച്ചു.
അസിസ്റ്റൻറ് എക്സൈസ് ഇൻസ്പെക്ടർമാരായ പിജി ശിവശങ്കരൻ, സി എ സുരേഷ്,സിദ്ധാർത്ഥൻ സിവിൽ എക്സൈസ് ഓഫീസർമാരായ റാഫി, ശ്രീരാഗ്,സജീഷ്, സതീഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.
